Қаржы мониторингі агенттігінің аумақтық департаменті тергеу аяқталғанын хабарлады. Күдіктілер заңсыз ойын бизнесін жүргізу арқылы ерекше ірі мөлшерде табыс тапты деп айыпталуда.
Тергеу нұсқасы бойынша, казино қызметі Шымкентте 2023 жылдың қаңтарынан 2025 жылдың қарашасына дейін жүргізілген. Ставкаларды қабылдау және ұтыстарды төлеу үшін 14-тен астам адамға рәсімделген шоттар пайдаланылған.
Экономикалық зерттеулер екі алаңның жалпы айналымы 3,1 млрд теңгені құрағанын көрсетті. Оның ішінде 2,6 млрд теңге ұтыс ретінде төленген, ал 685,7 млн теңге қолма-қол ақшаға айналдырылған.
Заңсыз табыстарға 213 млн 985 мың 634 теңге тұратын мүлік сатып алынған. Сот бес автокөлік пен екі жер учаскесіне тұрғын үймен қоса тыйым салған.
Іске қатысты адамдарға үйқамақ түрінде бұлтартпау шарасы таңдалған.