Бақытжан Садықов 1982 жылы бұрынғы Оңтүстік Қазақстан облысы Қазығұрт ауданының Шарапхана ауылында дүниеге келген. Ол М.Әуезов атындағы ОҚМУ-ді «Қаржы және несие» мамандығы бойынша, Шымкент университетін «Құқықтану» мамандығы бойынша үздік бітірген.
Садықов еңбек жолын 2003 жылы Астанадағы Ауыл шаруашылығы министрлігінің аумақтық басқармасының бухгалтерлік есеп және қаржыландыру бөлімінің бас маманы болып бастаған. Кейін сол министрліктің балық шаруашылығы комитетінде жұмыс істеген, Экономика және бюджеттік жоспарлау министрлігі жанындағы «Экономикалық зерттеулер институты» АҚ-ның басқарушы директоры қызметін атқарған, сондай-ақ «НК СПК Оңтүстік» АҚ мен «САО-Групп» ЖШС-де басшылық лауазымдарда болған.
2009–2010 жылдары Садықов балық шаруашылығы комитетінің қаржыландыру және ұйымдастыру-құқықтық жұмыс басқармасын басқарған. 2010 жылдан 2012 жылға дейін ол Қазақстан су шаруашылығы кәсіпорындары мен ұйымдары қауымдастығының президенті болған. Әр жылдары Мәдениет және ақпарат министрлігінде, Мәдениет және спорт министрлігінде қызмет атқарған, сондай-ақ 2017 жылы Алматыда өткен XXVIII Қысқы Универсиаданы дайындау дирекциясы басшысының орынбасары болған.
2018 жылдың наурызынан бастап Садықов Алматы қаласы мәдениет және архивтер басқармасының «Алматы әуендері» КМҚК-ін басқарған. 2026 жылдың сәуірінен жаңа тағайындауға дейін Түркістан облысы әкімінің штаттан тыс кеңесшісі болып жұмыс істеген. Ол «Ерен еңбегі үшін» және «Қазақстан Республикасының Конституциясына 25 жыл» медальдарымен марапатталған.
Түркістан облысы әкімінің орынбасары Ертай Алтаев жаңа басшыға өңірдің мәдениет нысандарының жағдайына талдау жүргізуді және саланың өзекті мәселелерін шешуді тапсырды. Сондай-ақ міндеттер қатарына жас таланттарды қолдау, туристерді тарту мақсатында фестивальдар мен конкурстар ұйымдастыру кіреді.